|
 Mer, dat sin 6 Mannslück fuhre met dem Böötche övver holländisch Flüss un Seen. He es en klein Dagebooch över dat, wat mer su erlääf han.
Dat janze jing loss am 16.05. un duerte bes zom 20.05. Mer fuhre met zwei Wage, wejen dem Jepäck un Vürrät. Zo dem Thema Vürrät hatte mer noch en Treffe em "Uns Büro", der Föschterstuv.
9. Mai - Föchterstuv
 Mer hann uns berode un jeder hätt sing Aufjab bekumme. Rudi un Manni surje vöör et Möffele un su praktisch Saache wie Klopapier, ich besorje de "hydrierende" Ding, weil ich su noh dran ben. De G(J)affel Brauerei hätt uns och e bessje dozo jedonn. Uns Skipper, de Bert hätt alles orjaneseert, dat mer tiereck affleje künne.
<- Un dat es nit alles wat mer jekouf han!
16. Mai - Affahrt 13:30h in Kölle
 Alt eeds han mer de Bert in Jladbach avvjeholt. Also Mönchegladbach. Loch sozusage om Wääch. Schnell jefunge met dem GPS-Deil vum Rudi, obwohl hä nit emmer su schnell lenke deit, wie dat Oos aansäht. Jod. Dann met in der Spetz 120(!), wejen de Gandarme noh de klein Stadt Niuwegein bei Ütrecht.
Do hann mer dann dat Scheff inspizeert un einije Mängel jefunge. Dat hat zor Folg, dat mer am möchste Daach en neu han in Beschlach jenumme. Die eetst Naach wor en besje anstrengend, weil et schöckelte un de Droppe om Daach eine öm de Schlof brenge dote. Jod möd wore jenoch, wejen dem Jaffel un doch helte uns de Droppe emmer ens wach.  Nu sin mer op dem schön jroße Scheff un han et wohl besser aanjetroffe. Affwade!
Un wer säht et. De Gasterm jeiht emmer uss. All paar Minutte sin mer met de Schwäfelcher dran un mösse neu an maache. Ävver dat wor et nit all... ...zweschedurch wood emmer ens de Klo, med allerlei Werkzeug, bearbig. Einzelhigge spare mer uns.
17. Mai - Gouda
 Noh vierenhalv Stund in de Kanäl han mer Gouda erreich un luure ens eröm. Dä Jachthaven vun Jouda es tireck an der Haupinkoufstroos. Ach, un de Manni meint, noh dem Landjang, die spreche ävver ne "Goudawelsch" un hätt natürlich Rääch domet. Ovens han mer en betzje Jaffel jedrunke un uns met "Uno" wachjehalde. 
Dann jof et noch Wing. Dat sullt eine wiesse sin. Bei uns hiess hä - Kabarett Sauv ming Jung (Cabarnet Sauvingnon) - Wingkenner wesse, dat die die Inkoufe wore, sich ene rude han aandrie losse. Ävver jeschmeck hätt er un dat es de Houpsach.
Am nöchste Murje dann fröh widder in de Kanäl, öm am fröhe Ovend Amsterdam zo erreiche un mer Jelejenheit finge ens "drövver" zo luure.
18. Mai - Amsterdam
 Ovens jejen 19:15h kome mer noh 9 Bröcke, die alle för uns op jemaht wede mote, em Jachthaven an. 
Dann han mer eets dat Scheff aanjelaat un dann jingk et in et Städtche. De koote Indruck wor alles düür un nitt e su geflecht.
 Naja, wie Jroßstädt halt sin. Wat mer bemerk han, ävver nit besök, dat wor dat Sex-Museum. Hatte einfach kein Zigg doför.
Späder noch in dat Jachtheim jejange un ein oder zwei Heineken met Bokma probeert. Hingerher woren mer bettschwer, su dat mer de Kajütte  han opjesök.
19. Mai - Loosdreschtsche Plassen
 Mer wollte fröh lossfahre, weil uns Manni wie emmer fröh zom Hüüsje mot un so alle och schnell in de Puschen kome. Do stund ävver, wie dat im Livve su es, en klein Jacht im Wääch un all die Tatedürstijen Junge un Mädche mote bes zehn waade. Do veel dem Mädche vun Scheff en, dat se och ohne ihre Kääl dat Scheffche bedehne kann.
Nu jingk et Richtung Heimothave, met noch einer klein Paus. In dem Have wor ene strenge Havemeister. Un mer mote zwei mol ömsetzte. Ävver als e jod Mannschaff, met vill Übung, weil de Bert uns jod aanjeliert hät, wor dat kei Probleem.
 Do han mer dann dat Scheff widderjefunge, wat mer emmer widder op der Tour jesinn han. Dat woren 8 Lückcher us Kettig bei Koblenz. Med denne han mer ovens noch e Bierche jedrungke un en Kessel met Chilli-Zupp jemüffelt. Wie dat su es, am letzte Ovend wed et jemütlich.
20. Mai - Rückreise
 Als mer öm 16.00h em Have vun dem Vermeeder anjekumme sin, noh einer Fahrt durch vill Bröcke un Schläus, öm us dem Rheinkanal wedder russ zo kumme, sin mer im Sauseschritt jejen Heimat jefahre. Noh einem Ausklang met der Mädcher in der Föschter sin dann brav heim jejange.
<- He hätt uns noch ens einer opjehalde, met singer persönlich Bedürfnis!
De jefahrene Rout süht mer he:
Nieuwegein - Gouda - Amsterdam - Loosdrechtse Plassen - Nieuwegein
He noch en paar Beldcher mih: Link
Un he noch die Belder vum Manni: Link
Aufgerufen: 1319
Powered by AkoComment Tweaked Special Edition v.1.4.6
AkoComment © Copyright 2004 by Arthur Konze - www.mamboportal.com
All right reserved |
Liebe Grüße an den Rest.
